Rauðvín, Ostar og Ljóð

Næsti félagsfundur JCI Reykjavíkur fer fram á þriðjudaginn kemur, þann 20 feb. Þetta er hinn árlegi þemafundur okkar, Rauðvín Ostar og ljóð, þar sem við smellum okkur í menningarlegri skóna og fáum til okkar góðan gest, yfirleitt ljóðskáld eða rithöfund eða einhvern sem sameinar báða kosti.  Einnig gæðum við okkur á rauðvíni og ostum, eins og titillinn ber keim af.

 Í ár verður gestur okkar engin önnur en Guðrún Eva Mínervudóttir, ein af efnilegri rithöfundum okkar af yngri kynslóðinni, og ætlar hún að fræða okkur um hvað hún hefur gefið út og haft fyrir stafni.  Fundurinn verður að þessu sinni í veisluformi, þannig að hefðbundnum fundarstörfum verður sleppt, og gæðum við okkur því að ostum og rauðvíni á meðan veisludagskrá fer fram.

Allir eru að sjálfsögðu velkomnir, en afar gott væri að senda inn skráningu þannig að við getum áætlað fjölda og stillt upp nægum sætum.  Verð per gest er 750 kr, og veitingar innifaldar. Fundurinn hefst kl 20:00 og er haldinn í JCI Húsinu, Hellusundi 3.

Sjáumst því hress í næstu viku, og væntanlega dettur hér inn einhver stutt lýsing á því sem fram fer hér á þessu bloggi.

 HG.

Heimsókn félagsmanna JCI Tampere til Íslands

Um síðustu helgi tókum við á móti 7 finnskum félögum úr JCI Tampere í Finnlandi. Þetta voru 7 eldhressir gæjar sem mættir voru uppí flugstöð með seinnipartsfluginu fimmtudaginn 1. feb, og þar vorum við 3 félagsmenn JCI Reykjavíkur sem tókum á móti þeim. Um var að ræða árlega ferð þar sem stjórnarskipti fara fram hjá þessu félagi, og voru þessir 7 kappar í fráfarandi og viðtakandi stjórn.

Skemmst er frá því að segja að þeir kunnu ágætlega við sig hér - á föstudag var haldið kokteilboð þeim til heiðurs  í JCI húsinu og að því loknu fórum við ágætis hópur út að borða á stað sem heitir Indian Mango. Flottur staður og góður matur, og skemmtu þeir einnig gestum staðarins með reglulegum fjöldasöng enda söngelskir með eindæmum.  Að þessu loknu var skellt sér á pöbbarölt, og urðu Thorvaldsen bar og Rex fyrir valinu, ásamt einhverjum fleiri þegar leið á nóttina.

Næsta morgun voru þeir svo sóttir í dagsferð útfyrir bæjarmörkin, og voru þar tveir valinkunnir merkismenn, forseti JCI Reykjavíkur Helgi Guðmundsson ásamt meistara Ragnari Valssyni sem tóku að sér þá ferð.  Einnig slógust í för hópur erlendra skiptinema sem staddir eru hér á landi við nám við hina ýmsu háskóla, og varð ferðin því hin skemmtilegasta.  Veðrið var einnig vel í takt við ferðalagið - sannkallað vetrarveður, og að íslenskum sið. Flott veður þegar hópurinn skrapp í stutta göngutúra hjá Þingvöllum, Gullfossi og Geysi en svo reyndar voru heldur óskemmtilegri taktar í veðráttunni þess á milli.

Um kvöldið var finnunum sjö boðið ásamt fleirum í heimapartí að íslenskum þorrasið, þar sem klassískum íslenskum mat var troðið uppí þá sem og íslensku brennivíni. Merkilegt nokk þá líkaði þeim býsna vel við matinn, í það minnsta þar til sumir uppgötvuðu að eitt hnossgætið voru hrútspungar.  Við það súrnaði heldur svipurinn á sumum. Láðist víst að nefna það fyrirfram... visvítandi. :-)

Aftur var haldið á pöbbarölt, og að þessu sinni varð Ólíver fyrir valinu. Samkvæmt heimildum voru þeir reyndar að heldur lengur en flestir gestgjafanna (jamm, við fórum heim í fyrra fallinu eins og verstu aumingjar...) og voru sumir að skríða heim á hótel um morguninn rétt í tæka tíð til að setjast uppí rútu. Sumir reyndar sváfu yfir sig og misstu af rútunni og tóku leigubíl í Bláa lónið, þar sem hópurinn endaði ferðina áður en haldið var útí flugstöð og heim. 

Allt í allt hin skemmtilegasta heimsókn.

HG. 

Skrár tengdar þessari bloggfærslu:

• dscf0003_124932.jpg